"Being Happy" par kuch

Khushi

Chahiye hum sabhi ko

Ussi ke liye toh

Saari daud hai...

Jab life mein stress ho uss jagah pohonchne jaha kam stress ho, yeh na bhoolo ke kal kissine nahi dekha. Kya pata uss jagah pohonchte pohonchte saansein kam pad jaaein. So khush rehna hai toh ab hi raho, mehnat karo par stress mat lo. Apni shakti se jo ho paae karo. Yoga asan bhi apne shakti ke hisaab se karte hain, samay ke saath sab siddha ho jata hai. Issliye khushi ko sabse ooncha darja do apni zindagi mein.

"On becoming mature" par kuch

Dekhe aise kaein

Jo pakk chuke hain

Par kya woh mature hain

Sochna padega...

Kabhi do saal pehle kari hui doston ke saath chat ka transcript padtha hu to lagta hai - kaun aise baat karta hai, kya fuddu pana hai baaton mein. Aajkal kaafi acchi tarah baatein kar leta hu main. Do saal baad, abhi ka tareeka shayad fuddu lagne lage. Par ek chiz acchi hai - khud ko mehsoos ho raha hai ke hum sudhar rahe hain, mature ho rahe hain.

Waise mature hona kisse kehte hain? Phalon ki baat karein toh poori tarah mature hone par yaani pakne par, woh khaane yogya hote hain, par kya aisa kuch hum insaanon ke liye bhi hoga - poori tarah mature hona? Socho toh lagta hai ke poori tarah mature hona matlab kahani ka the end.

Issliye shayad kehte hain ke bachpana hona chahiye insaan mein, majaak masti se javaani barkaraar rehti hai...:)


Note - Agar yeh article fuddu lage toh bhai sachmein, tum mature ho chuke ho...:P

"Having a job" par kuch

Duniyawale

Yahi chahen

Ke tum bhi unhi ki tarah raho

Chaaho unse peeche raho

Par kabhi na aage

Aur saath raho toh

Dosti pakki samjho...

Ab job ki baat hi le lo. Maine apni job chodkar kuch mahine nahi hue ke sab kehne lage ke beta kya kar rahe ho life ke saath? 27 ke ho gaye, aur koi apni beti nahi dega, so le lo naukri, acchi khaasi. Shayad mann mein aisa vichar rahega unke - Hamare jaise bann jaao, uss zindagi mein chale jao jaha kuch din ki roshni hai aur jyada se jyada sannata. Waise yeh unka vichaar nahi hoga, par yeh mere 5 saal ke career ki kahaani hai. Aisa nahi kehta ke haalat buri thi, par man ki stithi aisi thi, aur wahi maaene rakhti hai. Shubhchintak kahenge, bass uss par kaboo pa lo, fir acche se kategi life.Dekhte hain.

Par yeh vichaar shayad hi koi karta hoga ke aaj industry mein aise kai naujavaan mahinon tak bench par rehkar ya phir project mein hokar bhi bekari karke apni zindagi barbaad kar rahe hain. Lekin ek baat hai, ke unke paas job hone ka thappa hai, aur har mahine salary aati hai, jo shayad save hoti hai, shayad choo mantar ho jaati hai. Par job aur salary hona zaroori hai. Phir ghar bhi ho, usspar loan ho kisse parvah. Gaadi bhi ho, usspar bhi loan ho toh kisse chinta. Phir beta, tumhaara charitra jaisa bhi ho, hum tumhein apni beti denge, kyun ki ek ijjatdaar naagrik ka paatra play karne ki qualifications tum mein hai.

Aaj ki sacchai, hai kadvi, par hai hi aisi.

"Being Intelligent" par kuch

Hai dimaag

Toh chala na bhai

Kyun chal rahe ho

Kissi aur ke ishaaron par...

Agar tum hoshiyaar ho, apni hoshiyaari sahi jagah lagao. Kissi ke liye kaam karte, adarshon ka samman karte karte bass ek adarsh naukar banoge; amir bhi bann jao, par utne nahi jiss ke kaabil tum ho. Dekho, amir hona koi buri baat nahi hai, aur acchi baat bhi nahi hai, par poora din office mein lage rehkar, dimaag aur sehat bigaadna, aur gharwaalon aur samaj ka jyaada kuch bhala na kar paana acchi baat nahi. Usske liye upar wale ne tumhe hoshiyaar banaaya, aur tumne us mein se kaafi hoshiyaari ko ek 0% interest account mein rakh liya ho, toh kissi ko uss se faayda nahi hone waala. Aaj hi uss account mein se thoda bohot sona nikal lo aur socho ke kya kar sakte ho. Naukri ke saath saath, khel khel mein haath aajmaao. Jald hi naukri ki zaroorat nahi hai, yeh samaj mein aa jaega.

Aasha hai meri, mere bhi aise din jald aaenge.

"Do what you love" par kuch

Karo wahi

Jo Karna Chaho

Par pehle maan lo

Ke woh tum kar sakte ho...

Maan lo ke tumhe jitna paisa chaahiye woh tumhein milta jaega. Na kaam dhanda karne ki zaroorat. Kaisi hogi woh zindagi? Bohot lachaar. Sari zarooratein poori hongi, par mann mein shanti nahi hogi kyu ki tum woh nahi kar rahe jo tumhein anand de. Issliye yeh dhoondna bohot zaroori ho jata hai ke tumhein anand kiss mein aata hai, aur usse karke kiss tarah apna gujaara tum acche se chala sakoge. Hum pehel karne se pehle hi ek chiz ko impossible label kar de toh fir kuch na hona jayaz hai.